「香港夜繽紛」打頭砲的灣仔「海濱藝遊坊」，首日舉行即告甩轆，包括攤位斷電、招牌熄燈等。《追新聞》訪問了多位攤位檔主，他們均指參與市集志在宣傳本身品牌，有商戶稱因為夜晚市道實在太差，所以希望夜繽紛能真的推動經濟；亦有商戶明言沒有任何期望，故不會失望。不過，夜繽紛對夜經濟未見其利先見其害，有在灣仔的食肆就向《追新聞》呻生意未受惠之餘，還懷疑被市集搶走了人流。
《追新聞》特約記者Wesley Yip報道
灣仔「海濱藝遊坊」上月27日揭幕，在入門處檔位F36主打熟食及飲品的檔主陳先生接受《追新聞》採訪時表示，首日藝遊坊下午3時正式開放，「收尾到8點半有一個鐘電」，他說幸好自備雪櫃，食材無變壞，但對生意影響很大，「嘩，損失咗好多，起碼五分之四（生意額）」，惟不打算要求大會補償，「我哋都唔會㗎喇，因爲做生意，冇生意就冇生意。」他形容目前香港晚上很蕭條，「夜晚市道好差，周圍彌敦道8點半後就差唔多冇人，早5、6年夜晚黑11、12點都有人㗎」。他寄望夜繽紛帶旺市道，但擔心業主隨後加租。
▲海濱藝遊坊檔主陳先生表示，現時香港晚上的市道很蕭條，希望夜繽紛能帶旺經濟。
報道無罪 知情有價 請即訂閱《追新聞》：
https://www.patreon.com/thechasernews
另一間主打台灣地道美食的商戶指，早在2日前（9月25日）商戶就可以入場，「3日都未整好個電」，他指安排令商戶無所適從，「今日我嗌晒好多貨，如果拎咗落嚟又唔知點雪，又冇地方雪」。負責人指電力供應需向主辦方購買，當日要到晚上6、7時才能雪藏貨物，有一、兩箱貨品因無電已變壞，「我都唔敢攞太多落嚟」。
▲在市集主打台灣地道美食的商戶稱，對能否收支平衡信心不大。
該商戶續指，目前外邊的市道很差，「大家都上晒去大陸消費，又平啦、又好食、地方又大」，「我有朋友開餐廳，都好難頂，頂唔順」，對於夜繽紛是否能帶旺夜市，他直言有這樣的希望，「但係你唔希望就冇失望，我係當宣傳，所以冇寄望過」。對於補償方面，他指：「暫時冇講過咩，次次都會答『盡快盡快』」。至於今次參加藝遊坊能否收支平衡，「維唔維到皮，真係唔大信心，今日嘅人流唔係話真係好多，可能未到假日，今日唔可以做標準」。
前區議員張文龍：地區商戶憂顧客被大型活動搶走
小店「悅和醬園」主要售賣燒賣、腸粉、自家製豬腳薑，悅和醬園負責人Jack表示人流不錯，但同樣面對停電問題，「個電其實早兩日應該有嘅，可能好多安排上嘅問題，6點鐘我哋嚟到都仲未有電，好彩7點幾開始有返電，我哋都可以順利地做到生意」。
▲悅和醬園負責人Jack稱抱着嘗試心態參與夜市，當作宣傳品牌。
「生意影響實有啲嘅，頭一、兩個鐘做唔到生意」，Jack指因知道停電情況，沒將很多食材運到，因此「頂得住」。但說到出面的市道，「我哋做零售都知，個市道真係差嘅，生意額比上年同期起碼少咗兩、三成」。Jack指參加今次藝遊坊對自己的品牌有宣傳作用，「你當好似畀錢宣傳咁，都係抱住試嘅心態」。政府力推夜繽紛，但Jacky指日間市道其實亦頗為淡靜。
葵青區議會前副主席張文龍也趁首日到訪灣仔「海濱藝遊坊」。他向《追新聞》表示，想不到政府真的在遊客區的海濱長廊上，呈現一個「很街坊」的夜市。他指雖然當晚人流算不俗，但認為不會帶動到香港整體夜市經濟，「即係離開咗呢度之後，去番市區其實我都見唔到好多舖頭開」。他直言本地經濟非常差，「有少少活動帶動到少少經濟，即管睇下佢會點，一個觀望態度。」
▲葵青區議會前副主席張文龍相信，夜繽紛的活動無法帶動香港經濟。
張文龍續指，地區人士普遍對夜繽紛沒抱太大期待，「好多做小生意嘅朋友都話，『有咪有，冇咪冇』（夜市經濟），唔覺得有特別大分別，可能多個地方做生意，搵快錢容易少少，對於長遠經濟會唔會好咗，大家一致共識係：唔會」。以他服務的葵青區為例，不少地區人士擔心這類大型公眾活動「扯咗啲人流走」，加上不少人北上大陸消費，「唔單止係平而北上，而係覺得香港好嘅舖頭已經執晒，冇選擇」。
記者在灣仔「海濱藝遊坊」首日，亦有到灣仔一帶觀察，發現在海濱以外的地方，人流沒有明顯增加，似乎並無帶旺當區生意。灣仔餐廳「燒房焗」負責人接受《追新聞》訪問時透露，藝遊坊當日不但「一枱新客都無多到」，反而帶走餐廳本身的人流，感覺食客較平時少了，直言對於夜繽紛成效存疑。
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
