曾被視為香港預言書的電影《十年》，片末留下一幕「為時已／未晚」，讓觀眾深思。8年後再談電影，監製蔡廉明（Andrew）說：「我仍然相信為時未晚」，又提醒片末還有一段常被忽略的金句：時勢真惡。你們要求善，不要求惡，就必存活。
12月，多倫多初雪已過，移民浪潮讓港人四散飄搖。Andrew三年前舉家選擇在加拿大定居。安家後，他夥同在非牟利機構工作的前同事Chris等人，在多倫多合辦咖啡店Haven Brews，近月在北約克區揭幕。
咖啡店藏身在芸芸民宅中，黑膠唱片在店內一隅緩緩轉動，日光漫照在牆上的獅子山山線。「有啲人話，好似去咗大南街嘅coffee shop。」Andrew娓娓道來店名意指「避風港」；而另一名店長Chris則希望為社區提供喘息空間，「或者以後再回望時，喺香港歷史上有一段時間、有一堆香港人，喺香港或者香港以外嘅地方，繼續寫緊香港人嘅故事。」
《追新聞》特約記者陳減加拿大多倫多報道
-
- 金漆獅子山山線合眾人之力鑿成。
-
- Chris用心製作一杯精品咖啡。
-
- 咖啡店一角擺賣黑膠唱片。
-
- 咖啡店希望帶給客人一個喘息空間。
報道無罪 知情有價 請即訂閱《追新聞》：
https://www.patreon.com/thechasernews
相信為時未晚：心坎裏「擇善固執」
「經歷雨傘之後，當時導演同編劇只能想像最差嘅未來，所以套戲（《十年》）出嗰陣喺好灰，但事實證明當時想像得唔夠灰。」2016年，《十年》在一片爭議聲中奪得香港金像獎最佳電影獎，由獲獎至今未到十年，香港電影界已遭逢巨變。港府2021年修訂《電影檢查條例》指引，多套電影無法通過電檢條例公開放映。
Andrew此後監製的《憂鬱之島》也成為香港禁片。他感慨地說：「拍出嚟想畀香港人睇，但你唔可以喺最多香港人地方、或者唔可以喺屋企播，只可以喺其他地方播，係好可惜。」他聳聳肩苦笑說，不會因此放棄，「有啲嘢未必可以喺宜家做，但唔代表唔去做……或者用另外一啲題材去講，創作空間喺好大，當然宜家要更加靈活。」
每提及《十年》，觀眾腦海往往浮現片末「為時已／未晚」的一幕，8年後再談及這句話，Andrew仍然相信「為時未晚」。
「當年嗰句『為時未晚』，我哋嘅希望唔係『眼見嘅事情可以立即改變』，而係指我哋所保存嘅心態，你要承認困難先可以面對將來。」他提醒，片尾還有一段常被忽略的《聖經》金句：時勢真惡。你們要求善，不要求惡，就必存活。「善係你面對嗰種時勢，選擇去行善定行惡；堅持良善，擇善固執就係盼望，喺每一個人心裏面，唔係換咗政府或者換咗特首就有希望，希望從來都唔係嗰度（外在環境）。」
Andrew當年在金像獎領獎台上感言，《十年》早已超越一部電影，真誠地拍片亦能夠成為一股力量，「我記得當時話拎到獎，都要繼續謙卑，當時好多觀眾畀我睇到，香港係有希望，宜家雖然係離散（時代），但離散唔代表啲人唔再選擇關心香港。」
咖啡店辦比賽和市集凝聚年輕人
移民潮下港人散落在英國﹑台灣﹑加拿大、澳洲等國，Andrew在社會環境因素影響下亦決定舉家移民。咖啡店開業至今3個月，定位精品路線，期盼為社區創造文化空間。
Andrew在港除了製作電影，也為提供青年服務的非牟利機構工作多年，開咖啡店箇中原因是為了連結包括香港人在內的新移民。他解釋：「嚟到見到好多香港人，發現好多年輕人嘅需要未必浮面，包括情緒同群體嘅支援等，我哋希望戴番做青年工作個頂帽。」
咖啡店舉辦過兩場手沖咖啡比賽，以及一次市集，反應超出預期，比賽吸引近50人前來觀戰，當中大部份為年輕港人。Andrew驚覺咖啡文化早已植根年輕人，「有啲人話好似去咗大南街嘅coffee shop，對佢哋嚟講未必完全係，但嗰種感覺似。」
另一位店主Chris曾任職傳媒，一度轉職社企咖啡店工作多年。1年前，他隨妻移居加國，開始感受到咖啡店連結鄰舍的張力，以往街坊會在店內自由奉獻，也為區內學童補習，發揮着社區互助精神。
「當你有咗嗰地方﹑後續會有咩發生，我諗未必有好多Planning（計劃），但隨着人與人嘅相遇，我諗會超出原來嘅計劃。」比起「coffee shop」一詞，Chris傾向稱之為「Coffee Hub（聚集地）」。早前舉辦的市集除了港人檔主外，亦有本地小店參與。
Chris指在加拿大這個移民大國，寄望Haven Brews成為不同族裔人士的聚腳點，「除咗香港以外，世界都好亂，有時未必真係要硬碰，我哋可以點樣生活，點樣將人嘅美善價值保存，或者喺人好suffering﹑失去盼望嘅時候，我哋可以點樣一齊行。」
-
- 蔡廉明與志同道合港人合辦咖啡店。
-
- 一杯咖啡，連繫社區每一個人。
-
- 蔡廉明提醒《十年》片末還有一句《聖經》金句。
-
- Chris傾向稱這地方為「Coffee Hub（聚集地）」。
擁抱破損 繼續保存香港真實故事
「音樂﹑書同埋咖啡，本身喺好有chemical（化學作用）。」除了出售精品咖啡，店舖也與不同夥伴合作，店內設有Art Studio提供畫班﹑藝術治療等活動，牆邊一角寄賣小店的黑膠唱片，而近日又增設書櫃擺放香港藏書，「有一啲我哋預計唔到嘅化學作用發生，例如書店（邀約合作），特別（香港）書室喺呢段時期嘅變化。」
正值香港獨立書店和出版商相繼宣佈結業，另一邊廂海外港人努力保存香港書籍。當Haven Brews舉辦市集過後，就有小型書店提出合作邀約。Chris說：「佢（Andrew）拍電影，我以前都做過新聞行業，繼續保存香港真實嘅故事都喺我哋想做嘅嘢。」他希望盡做，始終香港人的故事由每一個香港人撰寫，將香港歷史拉長來看，回望時，有一堆香港人正在海外努力編寫自己的故事。
話鋒一轉，眾人焦點落吧檯金漆獅子山山線上。Chris介紹這道山線由他們合力刻鑿而成，參考了日本「金繼」工藝。他指，「金繼」承繼破裂，強調擁抱破損﹑接受缺陷成為生命的一部分，但「唔一定講香港，而係每一個生命，除咗香港新移民，還包括烏克蘭同阿富汗人，個個都有自己go through嘅事情。」
也許香港人，縱有裂痕，也能迎來重生。
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
