香港戲劇協會（劇協）周一（29日）晚舉行「第32屆香港舞台劇獎」頒獎典禮。上屆頒奬禮被藝術發展局指損害局方聲譽，批評劇協邀請了非戲劇界人士擔任頒獎嘉賓，又質疑獲邀的漫畫家尊子、前港台記者蔡玉玲是「當時充滿新聞話題」的人物。劇協今屆一改上屆做法，頒獎禮不再安排嘉賓頒獎，由主辦方的成員擔任主持。本屆頒獎典禮未獲藝發局資助，亦不獲康文署贊助頒獎禮場地，改由劇協自資籌辦，場地亦轉到灣仔一間餐廳舉行。
《追新聞》特約記者 Wesley Yip報道
頒獎禮主題「風」 馮祿德：講到明係揀善嗰面
▲劇協會長馮祿德表示，今屆頒獎禮以平常心進行，對於曾發生的大大小小風波，「當佢冇發生過，本乎我哋初心，我哋嘅原則就係合法、合理、合情，係唔會踩任何觸犯咗法律嘅嘢」。
今屆頒獎禮主題是「風」，被問到是否對當局撤銷資助的回應，劇協會長馮祿德表示不必作其他聯想，「風」是他們商討後的主題，「風係自然界嘅現象，如果你要解釋，可以有唔好嘅歪風、龍捲風你話幾得人驚」，馮強調風有好的一面，包括春風、薰風、和風，「所有風都係滋潤嘅，好嘅風令到生物、植物生長嘅」。馮祿德強調是「講到明」，不用當局揣摩，「我哋唔係揀黑面，係揀白面；係揀善嗰面，唔係揀惡面，你唔好屈我，我係揀好嘅意思」。
有記者追問今屆主題「風」會否又被指成有其他含意，馮祿德稱：「我哋成班藝術工作者，面對香港疫情啱啱之後，我哋係齊心重建香港、令到香港更好。」馮指藝術工作者有如氣流匯聚在一起，於是就成了風，「能夠滋潤生命，感化人心，好似化育萬物嘅春風咁，係咁嘅意思」。馮祿德又指希望一股清新的風，吹走以往積落的陰霾，吹走黑雲以及不好的東西。馮祿德又笑指在場記者，「唔好再咁樣諗嘢喇，不過咁都好，你咁諗，人哋先唔會咁諗。」
報道無罪 知情有價 請即訂閱《追新聞》：
https://www.patreon.com/thechasernews
今屆不設頒獎嘉賓 YouTube直播無重溫
雖然劇協表明會再申請藝發局資助，但對於再獲資助是否有信心，馮坦言沒有信心：「都係平常心，我冇得估人點諗」，他表示自己不喜歡用「封殺」、「打壓」這些字眼，也希望對方不是想這樣做，「點解要有敵我對立，點解成日要有鬥爭？」馮希望大家要從樂觀、光明的方向去思考。
今屆做法最明顯的分別是不再設頒獎嘉賓，主持亦由劇協幹事輪流擔任，YouTube網上直播亦不能重溫。
最佳導演方俊杰：可做嘅事內揀最好嘅方法
▲方俊杰
導演方俊杰憑《史家本第二零二三回之伏虎降龍》榮獲最佳導演（喜劇 / 鬧劇），被問到今年安排是否妥協或屈服，本身是劇協幹事（學術出版）之一的方俊杰表示：「睇你點定啦，我哋就唔會覺得妥協」，方指某程度上怎樣做都會被質疑，「我哋只不過係喺我哋可以做嘅嘢入面揀個最好嘅方法」。至於市民可以如何支持？方俊杰說：「好簡單，入場、買飛、睇話劇，因為劇場係需要觀眾。」
最佳劇后田蕊妮：今年成為一份子好榮幸
▲田蕊妮
以《大離婚日》勇奪最佳女主角（喜劇 / 鬧劇）的田蕊妮表示獲獎很開心，「今年可以成為佢哋嘅一份子我亦都好榮幸」，「舞台唔可以消失，係好貴重嘅一件事」。
林海峰、黃子華到場：氣氛好過金像獎
▲林海峰、黃子華到場支持。
獲提名最佳男主角（喜劇／鬧劇）的林海峰、黃子華亦有到場，雖然最終未有獲獎，但二人在頒獎禮中段見記者，黃子華笑稱：「你入去feel下，氣氛係好過金像獎好多」，他說每位出席者都很投入。被問到出席頒獎是否特意來支持，林海峰表示：「支持就一定係」。黃子華就指自己沒有想太多，因團隊用了很多努力去做戲，得到肯定，「一定係首先支持呢樣嘢」。
梁仲恆沒考慮不出席頒獎禮 憑自己個良心
▲梁仲恆
角逐最佳男配角（喜劇／鬧劇）、《飯戲攻心》踏台版的梁仲恆亦表示沒有考慮過不出席今屆頒獎禮，對於不獲藝發局資助需要轉換場地，他說：「唔緊要，有轉變係好正常嘅事」。對於社會氛圍對創作的影響，梁表示：「都係憑自己個良心」。
▲麥沛東
憑《各位起筷》角逐最佳男配角（喜劇／鬧劇）、電影《正義迴廊》男主角麥沛東，被問到有否考慮過不現身頒獎禮，麥斷言不會，雖然場地轉到餐廳，但是「輕鬆得嚟帶點隆重的場合」。麥沛東指演員的職責是「做好角色，講好個故仔」，令觀眾多看舞台劇。
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
