嚟咗英國，都要入鄉隨俗，學吓本地人點樣過聖誕。上星期講咗買棵真聖誕樹，同整燈飾，下一步自然係諗吓食啲乜。Charlotte自己對火雞就麻麻，但可以試吓Christmas Pudding、Mince Pies。不過，唔知大家有無人同我一樣，行入超市，見到有唔同品牌，花多眼亂，真係完全無頭緒，應該揀邊樣嚟試。

我之前都講過，反正個個品牌都咁陌生，我通常都揀畀大牌子平啲嘅超市自家品牌。咁其實味道、品質相差幾遠？Charlotte自己未試晒，不過Which？就成日做呢啲品牌比較，以唔少朋友都鍾意買嚟食嘅Little Moon芒果糯米糍雪糕為例，1盒6粒最平喺Asda依家都要賣4.8鎊，咁喺Aldi都有類似嘅Wao Monchi，一樣6粒只係賣3.69鎊，佢搵人做盲品，結果評分仲高過Little Moon。

而有啲自家品牌都分咗平價同貴價版，咁係咪又係愈貴愈好？以Sainsbury自家出嘅Cheddar Cheese為例，盲品評分又係好過Taste the Difference呢條貴啲嘅Line。

講返聖誕，Which？推介咗幾樣平得嚟又有質素嘅超市自家品牌應節食物，包括Aldi Specially Selected Mince Pie（1盒6個賣1.75鎊）、Asda Extra Special Christmas Pudding（8鎊），平平地可以試吓。

仲有，呢度聖誕好多時都會送禮物畀朋友、鄰居等等，表達謝意兼搞好關係，買支靚酒都係好嘅選擇，Which？就推介咗Aldi Specially Selected Crémant du Jura 2019同Co-op Irresistible Prosecco，都係10鎊內搞掂，亦唔太失禮。