親愛的Dr 蔡若蓮局長：

I hope you are doing well.

所謂「貴人善忘」，最近小學「人文」學科新出籠，要命令課程發展處的同事開工做嘢；加上又要好好「招呼」中聯辦太上皇鄭雁雄，任何時候要抓緊「國安」、「愛國」教育。

因此妳和妳的團隊可能對依家中小學幼稚園的校園、教室，加埋師生發生咩事未必好清楚，又或者覺得「我哋投放咗大把資源畀學校，點解仲有咁多問題？」事實上，過去十個月有27宗學生懷疑自殺身亡的個案，你都只係識得答「自殺是一個複雜的問題，由多項風險及保護因素互相影響而成，因而不能歸因於單一因素」。乜自殺原來係一個複雜的問題？乜嘢叫做風險及保護因素，究竟係邊一本垃圾兒童心理學教科書抄出嚟的廢話？

最近你寫字樓一定有同事睇咗《年少日記》，估不到係你同事卓永興個仔卓亦謙，拍咗一套咁受香港人支持的電影，仲要響今年第60屆的台灣金馬奬攞到「最佳新導演」及「觀眾票選最佳影片」，真的令香港人十分鼓舞，香港人加油！連我都專程出倫敦睇依齣戲，過程中只是不斷聽到觀眾的飲泣聲及呻鼻涕聲。我想電影的成功，不單只能夠引起共鳴，更能夠反映時代的面貌——社會的黑暗面、人性的邪惡及受害者的苦難。

我唔想蔡局長掃興，所以一定不會劇透；但蔡局長一定對電影裡面其中一個主角特別有「親切感」，就是由童星黃梓樂扮演的鄭有傑。點解？妳睇完依齣戲就一定知點解。但電影中一些情節及對白，值得深切反思。

「他跳樓死並唔係因為他成績唔好畀阿爸打，而係因為由始至終全家人無當過佢係屋企人！」

蔡若蓮局長，其實你有冇當香港的學生係「學生」？

屋企好有錢，有菲傭照顧起居飲食，放假可以跟屋企人去美國迪士尼，成績好可以有更多的零用錢，懂得玩一手好的鋼琴上台表演，可以識得個校長叩門入九龍塘名校，甚至大個一定要入Hong Kong U——這些一般庸俗及無知香港人眼中夢寐以求的理想生活，背後原來只是用虛榮和物質堆砌出來的邪惡生活。

「依間屋所有嘢都係我出錢買啲！」

依句對白真係非常符合依家你哋成班政府官員對市民的態度，因為我出錢買所以就大撚晒，然後一不符合心意就又喪打喪鬧個細路；原來仔女只係用嚟炫耀自己的工具。結果成績唔好的變咗地底泥。等我話畀你知：「成績好」的只不過因為當時願意兼有能力應付父親的虛榮心，先至化身成為父母心目中的「叻仔」。我相信蔡局長在電影裡面一定搵到適合你的角色！

最後，我有個朋友好mean但好認真咁講：「若果卓亦謙唔係做咗導演的話，應該已經唔響依個世界！」結果，佢唔單只生存到，仲做埋導演，更成功說好「香港故事」！

所以我，甚至不少香港人十分期望蔡局長能夠響妳的面書等社交平台，分享一下你睇完依部電影之後的心得，我唔知道係唔係因為學童自殺不是部門KPI的一部分，所以可以繼續扮睇唔到；但我十分清楚問題沒有得以正視的話，即使你攪小學的人文科、初中的公民、經濟與社會科及高中的公社科有幾出色，結果大家只係見到地下一大片血紅色，死者無休止的怨恨及關心下一代人士的怒火！

 

Kind regards

一名住於英國的離散港人

 

P.S. 無意中發現到你哋製作的「《世上只有》音樂錄像」，明白乜嘢叫做傷口裡灑鹽！

作者：黃偉國@COOTL

COOTL的使命
為留港的下一代保存真相，為離散的港人凝聚力量， 堅持普世價值 ，貫通全球視野。
FB: https://fb.com/cootl.hk/
IG: https://bit.ly/3iC3vvb
YouTube: https://bit.ly/3tDzdyH
Website: http://cootl.org/