唔少香港朋友嚟咗英國一段時間，都開始買屋落地生根。Charlotte有位朋友（叫佢N仔）最近就分享咗佢嘅慘痛經歷，都值得同大家講吓。話說佢今年中就申請定Mortgage，好快就睇中咗間屋，以為好好彩第一次出Offer就搞掂咗，點知先係惡夢開始。

首先，就喺Offer Accept咗兩星期後，N仔收到地產電話，話業主收到另一個Offer，簡單嚟講就係想抬價。N仔梗係好嬲，因為律師都做緊嘢，但無奈係英國一日未去到交換合約，雙方都可以隨時無條件反口，所以佢就諗吓有無咩嘢，可以同業主講打動佢。

點知佢認真睇完張Memorandum of Sale之後，就覺得有啲奇怪，明明之前講到業主係兩公婆，點解上面有第3個名，仲要完全唔同姓，於是佢就Google一吓，就有驚人發現，原來呢位第三者竟然係地產公司嘅Director，而一路係無人同佢講。

於是，佢就打返去地產公司，鬧佢哋有利益衝突，對方就即刻晒冧，講明唔會再抬價。雖然覺得佢哋唔多老實，但N仔當時因為太鍾意間屋，所以就繼續去馬。問題當然陸續有來，先係睇契發現有啲嘢同地產聲稱唔同，而且所有電力、EPC嘅測試都未做，但對方又聲稱租過出去1年，所以一係犯法，一係就講大話。

最大鑊係，N仔個Mortgage去到11月底就到期，銀行講到明因為利息加咗好多無得延長，佢已經係咁催賣家覆文件，結果去到11月中先收到，但好可惜，律師睇完發覺文件唔齊，仲要間屋喺Planning Permit、Building Regulation出問題，無可能趕及Mortgage完之前解決，銀行根本唔會批准用個借貸。N仔本身都有諗過係咪轉現金買就算，但賣家完全唔覺得自己有問題，無打算去糾正呢啲問題，同埋就算佢想糾正都唔知搞幾耐，所以N仔最後都決定唔買，個業主兼地產公司老細最後仲要鬧佢。

N仔當然勁嬲，明明佢因為咁無咗個低息Mortgage Plan，又要蝕律師、驗樓費，所以已經同咗唔少當區香港人分享件事，仲打算去投訴。聽完N仔個經歷，真係既憤怒又無奈，唯有安慰佢呢期樓價跌，可能搵到更好。同埋，下次買樓，考慮買份保險，交易有問題都有得賠，唔使損失咁慘重。