《黃耀明邊走邊唱歐洲》第二站周日（7日）移師倫敦Clapham Grand舉行，場地能容納1,250人，門票早已售罄，場外等候開騷的人龍一度長達500米，現場氣氛熾熱。「明哥」特別為倫敦觀眾送來連串驚喜，邀得好友兼著名填詞人黃偉文（Wyman）上台破例談新歌《石沉大海》的含義，同時明哥宣佈今年8月中將在香港會展舉行「邊走邊唱」演唱會，他感到興奮，香港開騷意義重大。  

報道無罪　知情有價　請即訂閱《追新聞》：
https://www.patreon.com/thechasernews

Wyman嘲明哥老花：手機每版得12個字 

明哥唱畢新歌《石沉大海》後，邀填詞人Wyman上台談新歌含義並因唱錯歌詞向他致歉：「大家多多包涵啦，我今年60歲㗎喇，一年畀一年差，所以都係要靠提示（字幕機）。」黃耀明自嘲時，台下觀眾大喊：「明哥！仲好靚仔呀！」Wyman不忘戲謔：「你部手機呢，每一版都係得12個字咋喎。」暗示其老花嚴重。  

 Wyman其後破例談創作《石沉大海》的來龍去脈：「其實我好唔習慣解釋自己嘅作品，因為如果首歌寫得好嘅，使鬼喺歌外邊解一大輪咩，寫得渣嗰啲先要啫，呢個係我自己嘅底線嚟嘅。」不過，他自圓其說：「但可以講花絮：一個填詞人，一筆一筆建立咗元宇宙出嚟，咁人物累積咗廿幾三十年，佢哋就會活起嚟，佢哋就會喺裏面有互動，而且唔同嘅角色、唔同嘅線路，有時交錯、平衡，就會有好多故仔出現。」 

「迷戀寫信給不回信的人」  

對於《石沉大海》說是《下落不明》的續集，Wyman說：「不如話喺元宇宙裏面有好多嘢同呢首歌有關嘅，我唔知點解，我講呢三首歌，係無諗另外嗰兩首，寫完晒攤晒出嚟：咦，有關喎。」他提到，對於寫信給不會回信的人有種說不出的迷戀，「《奇洛李維斯回信》（薛凱琪主唱）寫信畀上咗『神台』嘅人，《她整晚在寫信》（衞蘭主唱）係寫信畀上咗戰場嘅人，《石沉大海》係寫信畀真係下落不明嘅人，佢哋係有關係。」他指，自己的性格總是留有一絲希望，「所以我從來都無寫死我啲角色嘅」，在最絕、最盡都會「open ending」，讓受眾抱有希望，所以薛凱琪會得到回信，衞蘭「to be continued（待續）」，「至於《石沉大海》，我信有一日收到回信。」  

明哥稱在後台化妝得悉Wyman剛獲「Chill Club年度推介填詞人獎」，率先向他道賀。Wyman笑言終於可以一次過公開抒發感言，「所以我呢幾年好努力令到自己有獎攞，就係為咗有得表演棟篤笑。」還戲稱當年中大讀社工經常「走堂」跟明哥等人一起去玩，差點未能畢業。當明哥指Wyman當年讀社工是想幫到更多人，不只是香港人時，Wyman反問：「仲有第二啲人咩？我剩係想幫香港人咋喎！」隨即引來全場掌聲雷動。  

「只要廣東歌需要我，我會繼續寫下去」  

Wyman指過去沒嘗試過「Long D」（異地戀），「而家好似連本帶利要還番幾十年Long D，一次過要同幾百萬人Long D，無計啦，命運安排咁嘅話，唯有勤力啲日日寫情信啦。」  

Wyman近日在倫敦接過ViuTV主持駱振偉越洋頒獎時坦言十分感動，他在得獎感言中提到自己在中文大學社會工作系畢業，一直耿耿於懷未能從事幫人的專業，但最近在英國遇到樂迷，他們走過來說：「你嘅作品幫到我。」Wyman哽咽：「呢件事，令我有好重要釋懷嘅感覺。其實我想話，我要多謝你哋先至真，因為你哋賦予咗我職業生涯一個好重要嘅意義」，「只要廣東歌需要我，我都會繼續努力去寫一啲大家需要嘅歌。每一次我聽住Demo，拎起支筆，我都係掛住你嘅，多謝大家！」

【倫敦站：演唱曲目】

1. 開場音樂：獅子山下
2. 這麼近那麼遠
3. 浮生六劫
4. 戲劇人生
5. 做一場給世界看的戲
6. 借借你的愛
7. 萬福瑪利亞
8. 誇啦啦
9. 春光乍洩
10. 下落不明
11. 石沉大海
12. 家明
13. 親愛的瑪嘉烈
14. 下一站天國
15. 美麗在心頭
16. Massive Attack – Teardrop
17. Suede – Saturday Night
18. 漩渦
19. 阿姆斯特丹
20. 攞命舞
21. 下流（國語版）
22. 邊走邊唱
23. 這個世界會好嗎–李志
24. 住
25. 今天世上所有地方
26. 自由之夏

Encore
1. 忘盡心中情
2. 抉擇
3. David Bowie – Heroes