英國乜鬼都抽稅，投資都唔例外，好彩有ISA，每年有2萬鎊畀你去投資免稅，除咗上星期講過嘅Lifetime ISA，其實仲有幾款產品可以考慮。最穩陣自然係Cash ISA，齋收息，另外仲有買股票、基金嘅種類。就算未夠18歲，其實都可以幫仔女開個Junior ISA，因為成人2萬鎊嘅投資免稅上限，可能有啲人都唔夠用，咁不妨用埋子女每年有9,000鎊呢個限額，如果以儲蓄計，有啲細啲嘅銀行，年利率講緊都有成3.8%，雖然金額就唔係多，但勝在穩陣。

今次想講吓比較少人講嘅Innovative Finance ISA，戴返個頭盔，Charlotte唔係咩專家，純粹都係個人經驗分享。簡單嚟講，呢類投資係似係眾籌債券、點對點借貸，你係要經過一啲P2P平台，直接借錢/投資畀一啲需要籌集資金嘅項目，可能係起屋、起橋等等。佢嘅回報較一般吸引，平均都有6至7%，有啲甚至去到8%，當然佢風險又會高啲，因為萬一呢啲項目最終無辦法還錢，咁投資者就要直接承擔風險。

咁都有啲方法可以盡量減低風險，呢啲P2P平台會盡職調查，分析每個項目嘅風險，例如過往還款紀錄、借貸比例、抵押品價值等，投資者可按呢啲資料去評估。另一方面，如果想再安全啲，可以揀每個月還款，咁雖然回報低過一次過收返啲錢，但叫做可以減低蝕到渣到無嘅機會。仲有，呢啲P2P平台都有唔同門檻，有啲項目你就算放100鎊落去都可以，唔使將雞蛋放埋同一個籃。Charlotte自己都係少少地玩吓，當試吓新嘢，大家有興趣就自己上網研究吓。