大家準備好未？荷包大出血嘅日子又嚟喇，係呀，11月又係Black Friday優惠出沒嘅時間。不過，大家唔好見到減價就撲埋去，事關Black Friday都未必真係抵。

英國消費者機構Which？喺2020年做過調查，睇咗119件受歡迎嘅電子、家居同啲個人護理產品喺黑五前後嘅價錢做比較，就發現85%嘅所謂優惠其實喺過去半年嘅時候已經做緊，甚至可能仲平啲，而98%貨品喺之後半年，都係有做過呢個價錢，所以見到「減價」時，都不妨Check吓係咪真係平咗，若果賣晒，又唔使失望，相信好快又會出現番。

點樣Check價？除咗之前提過嘅CamelCamelCamel，仲可以睇埋Pricerunner同PriceSpy，因為Camel主要係比較Amazon嘅價錢，後面呢2個網站就可以睇埋其他網，有冇平啲嘅選擇。

最近多咗朋友收屋，大家都開始要買電器，其實除咗Amazon、Argos、Currys呢啲公司外，仲可以睇吓Richard Sounds同AO.com，兩間喺Which？都有唔錯評分，其中喺Value for money一項都係滿分。

Charlotte自己仲會睇吓Cashback有咩優惠，例如可以買定Giftcard再趁黑五消費，仲可以睇吓有冇額外Cashback，事關呢期已經有唔少舖頭做緊暖場優惠，就連Tesco依家都有唔少嘢，好似玩具、廚具呢啲有8% Cashback，最誇張係如果你未試過用佢嘅Click & Collect，買滿25鎊佢會有8鎊回贈，真係好誇張。

最後，又要講多次，如果大家喺Amazon落單，記住用smile.amazon.co.uk，每次買完嘢，Amazon都會捐番單價0.5%去你指定嘅機構，咁就梗係要支持吓一直為香港發聲嘅Hong Kong Watch。