專欄停咗一星期，係因為上星期去咗自駕遊，今日真係要同大家分享吓。今次去咗英國熱門旅遊區Cornwall同Devon，雖然唔係夏天去，但一樣食到靚海鮮、風景又咁好，人仲要少咗，可惜係去St Michael’s Mount嗰日太大風，無船過去，好彩無事先買定飛。

不過，Charlotte事後諗返，今次旅程實在太穩陣，事關今次全程住Premier Inn，唔係話佢唔好，相反雙人房一晚只係50至60鎊，間房企理，又有得泊車，重點係張床好好瞓，隔音又唔錯，有啲似以前喺日本住JR集團酒店，絕對係值得推介。不過，我返嚟先發現，除咗連鎖酒店，其實應該住吓Cottage。英國消費者組織Which就提到，10月去Cornwall、Devon呢啲地方住Cottage比暑假時足足平咗七成。

Which仲介紹咗幾個訂Cottage嘅網站，好似Classic Cottages、The Landmark Trust、Rural Retreats、 Sally’s Cottages，就連National Trust都可以訂，呢啲都係本地人評分唔錯嘅網站。我就上去睇過，依家一家四口去住7晚，最平300幾鎊就有交易，唔少仲可以帶埋狗仔一齊住。如果想搵啲有特色嘅住宿，就可以試吓The Landmark Trust，連塔（Tower）都有得住，兩個人住4晚都係200幾鎊，小朋友仲可以扮吓公主，應該都幾過癮。

不過，揀呢啲Cottage真係要睇清楚地點，因為我今次去St Ives時，就試過俾Waze老點行咗啲細路，最窄試過得5呎，我哋好彩係細車，但前面架寶馬就用咗10分鐘先勉強過到，而呢啲Cottage係有機會喺呢啲細路入面架，所以大家真係要留意吓。