唔知大家有無換到VisitBritain嗰20鎊Discount Code？Charlotte就成功換咗，跟手就訂咗個原價要35鎊嘅遊船美食體驗，即係每人只要畀15鎊就可以坐喺船上一邊遊泰晤士河，一邊食個Lunch，兼同老公慶祝生日，真係好抵！錯過咗唔緊要，英國成日都有呢啲優惠，Charlotte幾乎每次網購，都會搵吓有無Coupon Code可以用，隨時又慳多少少。
一般買嘢嚟講，可以睇吓VoucherCodes、MyVoucherCodes，甚至係Wowcher呢類網站，不論係買衫、鞋、家居用品，甚至係去旅行等等，都可以睇睇，雖然唔一定搵到啱心水嘅優惠，但一試無妨。
如果有時想出街食餐好慶祝吓，又或者想住吓靚酒店當Staycation，就可以試吓Lastminute，佢不時都有唔同減價優惠，我寫稿之時，就見到有個喺倫敦Shangri–La Hotel, at The Shard嘅優惠，喺35樓望住夜景食3道菜嘅晚餐，二人價係84鎊（未計稅），以喺倫敦五星級酒店嚟講，都算係抵。平民啲嘅選擇都有，例如有啲三道菜連酒水嘅套餐，二人價都係講緊50幾鎊。
除咗餐廳，仲可以搵到唔同體驗，例如做Spa、坐熱氣球、直升機、跳降傘、 揸Supercar，甚至小型飛機都有，Charlotte都估唔到英國都有咁多嘢玩，買嚟當禮物送畀朋友都唔錯。如果打算去蘇格蘭旅行，就可以睇5pm，可以搵到唔少筍盤，好似住愛丁堡Hilton酒店，包早餐仲送Prosecco，都係講緊69鎊起。
講到呢度，Charlotte呢個專欄唔經唔覺都寫咗1年，雖然好多時都係啲細眉細眼嘢，但希望都分享到一啲實用資訊畀大家。寫咗咁耐，都係時候停一停，諗一諗，等我發掘多啲新題材，再擇日回歸。
Charlotte
出生草根家庭嘅港女，自小養成慳儉性格，但唔等於節衣縮食，認同應使則使，更鍾意用好抵嘅價錢去享受生活。以前一年去幾次日本，前年移居英國，但慳錢嗜好終身不變。
