上星期講英國本地遊，大家反應好似唔錯，既然係咁，今個星期不如繼續講，反正到年尾，又係時候計劃吓出年啲旅遊大計。以前喺香港，如果放假，唔使諗一定係去日本，但係依家要返鄉下唔容易，所以都要認真諗吓英國有咩好玩，而且經過今次自駕遊，我覺得英國啲旅遊體驗其實唔係咁單一，可能只係唔識包裝推廣（通常啲相又唔夠IGable），所以我哋未係好了解。

睇吓Which做嘅票選最佳歷史景點，其實頭十個地方，好多都唔係香港人熱門到訪嘅景點，好似排首位嘅Fountains Abbey，係英國最大同保存得最好嘅熙篤會僧院遺址，仲係UNESCO，不過我見唔少人去約克郡又多數只係行吓古城。並列首位嘅仲有Royal Yacht Britannia，呢隻船唔單止女皇坐過嚟香港，佢最後一項任務就係喺1997年接彭督一家返英國，所以香港人應該好有親切感，依家仲可以喺船上面住返晚，下次去愛丁堡一定要去睇吓。

講開住，除咗上星期提到嘅Cottage，英國人都鍾意住吓Resort，呢啲Resort雖然無日本星野集團嗰啲咁靚，不過都幾有特色。Charlotte就睇過其中一間評分唔錯嘅Waterside Holiday Group，最吸引我嘅係Hot Tub Holiday，應該可以頂吓浸溫泉癮，有啲仲可以揀Safari或者Caravan類型住宿，住兩晚大約係幾百至1,000鎊，一般住到4至8人不等，仲有埋廚房，約埋一班朋友或者2、3個家庭一齊去玩，應該都唔錯。英國咁多Term Break，呢啲Resort好受一家大細歡迎，所以大家有興趣就要提早訂，可能仲有早鳥優惠。