![](https://thechasernews.co.uk/wp-content/uploads/photo_2023-03-09_23-49-00-1000x1000.jpg)
呢個星期英國好多地方都落雪,不過好大機會係今個冬天最後一個冷鋒,春天應該好快就到。捱過冬天,大家高興之餘,都唔好忘記,又係時候開始要打理花園。雖然係要體力勞動,但將花園打理得靚靚,心情都好啲。
Charlotte覺得,要整靚花園其實都幾揼本,每次去Garden Centre行一轉,都會跌錢。不過,其實只要你留意吓,原來呢度有唔少派種子嘅活動,係可以登記領取。我舊年就成功拎咗兩款唔同種子,第一個就係together TV,佢依兩年搞咗個叫Sunflower Challenge嘅活動,每年都送幾萬粒向日葵種子,鼓勵大家調理農務,仲畀埋教學手冊畀大家跟,12個星期就可以種出大大朵向日葵,Charlotte以前喺香港係植物殺手,上年跟住做,又真係成功喎!
另一個就係嚟自本地蜜糖品牌Rowse,佢寄嚟嘅係一包乜花都有嘅種子,佢嘅出發點好直接,就係希望大家可以一齊種花,為蜜蜂提供更佳嘅生態環境,的確係好有意思!
事實上,呢度仲有唔少機構、組織都有免費種子送,好似Kew Garden 上個月趁春天嚟之前就派過種子,WWF都送過Poppy種子,就連Lidl、Birds Eye、Nestle、Airwick呢啲公司、品牌都有搞過送種子活動,威爾斯政府直頭試過向當地居民送樹苗添,可見送種子喺英國係一種幾咁普遍嘅社區宣傳活動。雖然唔係咩值錢嘢,但幫到花園扮靚,又造福環境,一舉兩得。