有位年輕朋友，最近終於喺英國搵返本行嘅工，Charlotte都好為佢高興。不過佢返咗一排，就呻同同事之間無咩話題，唔知點算好。呢個煩惱，我諗好多香港人都經歷過，唔單止同同事，就算係遇到鄰居或者其他小朋友家長，除咗「說好香港故事」，唔通次次都只係講天氣咩？

Charlotte自己之前參加過由英國政府資助、歡迎香港人融入嘅Welcome Course，當中都有分享吓大家可以同英國朋友講乜。除咗宗教、政治，或者好私隱嘅嘢唔好亂咁問人，其實大家都係講吓日常生活、電視節目、去咗邊度玩，又或者條路有幾咁多Potholes等等。所以，要搵嘢講，咪學吓本地人做啲乜，睇多啲電視、新聞，放假就周圍出去吓，咁樣日積月累，應該可以搭到咀。

無嘢講亦可能係因為英文唔夠好，詞彙唔夠豐富，於是令到自己講嘅嘢好局限，或者表達得無咁好。所以我覺得睇電視、睇新聞係好重要，我自己就用緊中學時嘅方法，見到唔識嘅字就會抄低，寫埋點用，得閒就睇吓。

我仲特別鍾意睇啲報章頭版撮要，除咗知道有咩國家大事，啲標題用字通常都好貼地，有時啲小報仲特別啜核。唔使錢學英文嘅方法，仲可以上網，除咗睇YouTube，我自己仲會上Coursera睇下有咩嘢可以讀吓，唔少英文堂其實係免費，有啲講明係專攻small talk或者對話詞彙，有啲就係改善發音。

話時話，大家呢期一定要睇ITV嘅「I’ m A Celebrity Get Me Out Of Here」，我會形容係英國版叢林的法則，參加者除咗有俾人鬧得好勁嘅前衞生大臣Matt Hancock，仲有男歌手Boy George，真係夠晒話題性！