今年10月19號係BC省（British Columbia，又稱為卑詩）政府嘅選舉。讀者可能對依個名好陌生，但係大家都好大機會識得親戚朋友住喺依度，因為BC省就係加拿大溫哥華嘅所在省份喇。如果讀者有留意今年英國大選，甚至有資格投票嘅話，你亦都可能對BC省嘅政制已經略知一二。
加拿大省政府奉行西敏制
加拿大係英聯邦成員亦係前英國殖民地，所以加國嘅聯邦同省政府都仿效英國嘅西敏制。加拿大嘅國家元首係查理斯三世，而每個省都有佢嘅代表，稱之為省督 – lieutenant（讀音為 “lef-tenant”）governor，有象徵式嘅憲政權力。BC省政府嘅立法機構就叫做省議會（legislative assembly），代表由直選產生，叫做省議員（Member of Legislative Assembly – MLA）。BC省議會喺今次選舉一共有93個席位，每一個席位代表一個選區（electoral districts, 俗稱 riding），以人口比例劃分。省選時就有唔同政黨派出嘅候選人角逐席位，選舉完畢時擁有最多議席嘅政黨嘅黨魁就會成為省長，組成內閣政府，領導行政架構。由於加拿大奉行聯邦制，省政府同聯邦政府互不隸屬，當中亦都有唔同或重疊嘅職能。例如外交、國防方面當然係由聯邦政府負責，但係省政府亦都會派代表團到唔同國家交流或者推廣本省嘅貿易同旅遊。移民政策亦都係聯邦政府嘅職責，不過為咗迎合各省嘅需要，聯邦政府亦賦予一定權力畀各省去揀選佢哋認為適合嘅人。兩級政府都會負責醫療，不過一般醫療服務就係省政府負責管理。聯邦政府負責撥款畀各省份，而各省政府亦都會有稅收撥款到醫療開支。話雖如此，聯邦政府亦都有公共衞生部門推廣一啲公共衞生議題。
今屆省選花生多
由90年代開始，BC省政府一直由BC自由黨（BC Liberal Party, 別於現在執政聯邦自由黨 Liberal Party of Canada）與新民主黨（New Democratic Party, NDP, 為全國性政黨）角逐，而零星議席就由綠黨（Green Party）贏取。BC自由黨由2001年至2017年執政長達16年，直至2017省選，無一政黨取得大多數席位，綠黨則擁有關鍵席位造王，支持NDP執政。BC自由黨民望自此一直低迷，NDP更加喺2020年選舉擴大席位，正式組成大多數政府。2022年時，BC自由黨為試圖挽回民望改名成BC聯合黨（BC United），其後卻因內部爭議，陸續有現任聯合黨省議員喺任內跳船至一直未取得任何議席嘅另一政黨、BC保守黨（BC Conservatives）。BC聯合黨嘅黨領Kevin Falcon更喺上月底宣布暫停選舉工程，呼籲支持者聯合陣線投票俾John Rustad領導嘅BC保守黨，與現任省長David Eby帶領嘅NDP爭奪執政大權。
由「住」及興：省選關我乜事？
省政府有好多政策都對省民有直接嘅影響，例如點樣處理醫療服務、中小學同高等教育、基建、房屋、社會福利等等。省政府亦可有限度咁影響省內嘅移民政策。無論你而家有冇投票權，政府嘅政策都會影響到你。住喺度，要享有一個興旺嘅社區，真係要靠大家參與。如果冇票嘅可以點發聲呢？有票嘅又會唔會趕唔切登記做選民呢？點樣做功課？如果投票日你唔得閒又點算？
有見省選在即，溫哥華街坊會與香港屋、溫哥華香港協進會、公民協進會、創新天移民服務協會、港伴等港人組織會舉行唔同嘅活動讓港人可以知道更多關於省選嘅資訊。我哋亦得到溫哥華公共圖書館支持，喺9月9號星期一合辦名為「由『住』及興：省選關我乜事？」嘅活動，希望大家都可以捧場參加！
由「住」及興：省選關我乜事？
日期：9月9日（星期一）
時間：晚上 6:30 – 8:00
地點：溫哥華中央圖書館, 350 West Georgia St, Vancouver V6B 6B1 （唔喺大溫地區嘅讀者亦可於網絡收睇直播）
活動重點
簡介：了解省政府嘅結構、職責；投票嘅重要性；省政策點樣影響你嘅日常生活。
座談會：由經驗豐富嘅專家分享佢哋嘅投票經驗、新移民面對嘅挑戰，同埋點融入本地社會。
問答環節：解答你嘅疑問，深入了解點樣喺BC省發聲、表達訴求。
報名參加：https://vpl.bibliocommons.com/events/66bbb8e02486bf251bbc57c8
溫哥華街坊會
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
