「有男/女朋友未呀？」、「結婚未呀？」、「生仔未呀？」
每逢過年嘅時侯，食團年飯、去親戚長輩屋企拜年，少不免俾三姑姐四叔公「關心」下。移民咗嚟加拿大之後雖然可以完美避過上述嘅煩膠問題，但係冇人問你，又覺得過時過節嘅時候少咗一份熱鬧，一種氣氛。
喺加拿大，特別係溫哥華，每逢過年嘅時候，好多商戶、社區中心等都會有啲過年嘅裝飾，老牌僑團或者會有啲賀年活動。睇下又好似缺乏咗啲喺香港過節嘅一啲感覺，又唔係好啱嘴形。
今年街坊會同香港屋兩個溫哥華嘅港人團體會喺2月4號，喺溫哥華 Yaletown 嘅 Roundhouse Community Centre 合辦一場賀年活動，叫做「迎春接龍港新年」。顧名思義，我哋會從一啲街坊過年必做嘅嘢獲取靈感，設計不同主題嘅遊戲、活動同大家一齊迎接喜樂、平安嘅龍年，拾回一啲喺香港過年嘅親切感。
▲「迎春接龍港新年」將會喺2月4號喺溫哥華Yaletown Roundhouse 社區中心舉行。
參加過週年晚會或者香港人市集嘅街坊都知道我哋嘅活動一定係有嘢睇、有嘢玩、有嘢學、有嘢買、有嘢送。為咗依個活動，我哋會推出充滿港式情懷嘅限量版利是封，自家設計盛載團隊對大家嘅祝福，希望喺溫哥華傳遞農曆年過節嘅暖意。參加活動嘅街坊亦可以收到活動限定嘅廣東話揮春，同贏取多個港人商戶送出嘅抽獎禮品！
打麻雀、寫揮春依啲不在話下，當日亦都會有由創意豐富嘅義工設計嘅攤位遊戲，更加有好多靚靚打卡位。又有「語你童行」嘅媽媽們畀小朋友參與嘅語文體驗區。除咗有廣東話同英文嘅故事時間外，更提供美式手語，等有聽障嘅大小朋友都可以一齊玩。
除咗一解港人移民嘅思鄉病，活動嘅另一目的係畀第二、三代移民、其他族裔同本地人體驗一下港人過年嘅活動同氣氛。當日所有活動都有中英文介紹，歡迎大家叫埋朋友、家人、同事一齊嚟玩！到時見！
溫哥華街坊會
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
