話說呢半年加拿大多咗幾間新嘅電訊公司，而比較多人討論嘅就有綠色品牌嘅Fizz同埋黃色品牌嘅No Name Mobile。
先講講Fizz，佢最初喺魁北克省投入服務，直至2023年11月先喺大溫哥華地區開通服務，其後拓展去到部份卑詩省其他地區。呢間電訊公司所有手續都需要上網辦理，而每張電話卡費用係加幣$15。服務費用頭兩三個月會要有一折優惠，加上使用推薦碼有$25折扣，變相相等半年免費，雖然而家已經變返正常價，但係佢哋嘅月費計劃比其他電訊公司低同埋有彈性，用戶可以喺官方網頁隨時更改佢哋嘅數據量、開刪佢哋嘅通話、留言信箱、同埋部份地區嘅長途電話服務。
起初小編測試呢張電話卡嘅時候主要係行Rogers網絡，但係而家已經變咗Freedom網絡，網絡狀況比較唔穩定，經常會由4G跳去3G嘅情況。唔驚網絡質素、追求有彈性同要有香港長途電話分鐘嘅人可以考慮吓用呢張電話卡。
至於No Name Mobile，就係2024年4月8日開始運作，隸屬於PC Mobile。No Name Mobile係需要喺Loblaw旗下指定嘅舖頭購買佢哋嘅電話卡，再喺官網啟動電話卡揀月費計劃。而佢哋提供六個唔同嘅月費計劃，比較吸引人嘅係$29有25GB同$34有55GB。彈性冇Fizz咁多同埋冇長途電話增值服務，但係佢哋嘅無限通話分鐘係包埋美國，非常適合經常往返美加嘅人。
呢張電話卡係使用Bell嘅網絡，適合一啲用數據比較多同埋追求網絡穩定性嘅人用。No Name Mobile同PC Mobile嘅分別主要係PC Mobile係有5G計劃，而No Name Mobile淨係提供4G計劃。至於優惠上嘅分別，No Name Mobile加信用卡自動轉賬係會額外送多5GB，而PC Mobile就可以同時間儲PC Optimum，啟動電話卡當日起計頭兩個月仲會送多額外20,000分。
最後，唔同公司喺唔同嘅日子會有唔同嘅優惠推出，大家不妨留意吓佢哋嘅官方網頁，睇吓邊一個計劃最適合你。
溫哥華街坊會
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
