「建制派成日話我係難民之父，專幫難民，我點都想像唔到自己會變成難民。」五年前被示威者抨撃為「左膠」的立法會前議員張超雄，2022年出獄後不久即舉家流亡到加拿大。
張超雄自2004起當選過三屆立法會議員，在社福界走過16年，周旋在弱勢﹑貧窮﹑難民﹑新移民﹑殘障議題之間，他所屬的工黨更是傳統泛民派，路線相對溫和，在2019反送中運動中，張超雄灑淚勸阻7.1抗爭者衝擊立法會。直至立法會內會發生衝撞，張超雄在主席台前多次高呼：「李慧琼越權！」因而被控違反《立法會權力及特權條例》一項藐視罪，被判即時監禁三周。
立法會內會衝突判囚入獄
「懲教好嘅當你係件物件，唔好嘅唔當你係人」
監獄剝奪囚犯的自由——還有尊嚴。一隻膠羹﹑一枝牙膏﹑一條白毛巾﹑一卷廁紙和一組囚犯編號，頓成他的所有。剛「泊正」的時候，張超雄並不了解牢房內的規則，「有次『殺到』經過，個個都要立正企喺囚室門口同佢打招呼，嗰陣無人同我講呢啲規矩，我唔識得同佢講『Good morning, sir』，之後就掟咗我入『水飯房』。」
（編按：「泊正」指已定罪的囚犯；「殺到」指高級懲教官員經過；「水飯房」指關押犯錯囚犯的隔離囚室單獨囚禁）
入獄的日子正值武肺疫情高峯，疫情影響下放風時間取消﹑訪客禁止探訪，物資無法送進獄中。除了洗澡時間可以走動外，其餘大部份時間待在倉內寫信與家人交流，「最初三日連筆都冇，原來監獄嘅環境冇筆冇紙好痛苦，完全表達唔到自己。」在囚日子雖然難過，但他坦言能夠預視刑期，相較還押無期的案件要好。
報道無罪 知情有價 請即訂閱《追新聞》：
https://www.patreon.com/thechasernews
難民倡議成流亡寫照
「如果批評政府已經詮釋為引起對政府仇恨，點樣繼續去做倡議既工作？點樣繼續指出政策上唔公平或者唔理想嘅地方？」出獄後的日子張超雄形容猶如「生活在極權下的恩賜」，「我無辦法預測幾時（警方）6點鐘嚟拍門拉我，閂咗我喺牆裏面，永遠都要誠惶誠恐。」他憂慮再度入獄後，太太需要一人肩負探監和照顧嚴重智障次女盈盈的重擔，又預料李家超上台後加強打壓民主派，於是在2022年5月特首選舉前幾天決定舉家流亡加拿大。
盼投身加國社福推進制度
盈盈的照顧需求較高，需要協助餵食和如廁等，張超雄一心以為加拿大社福服務對女兒更有利，後來才切身體會到當地社福資源匱乏。多倫多的院舍大部份為獨立營運且費用昂貴，單日收費近140加元（約800港元），政府提供資助不足兩個月便耗盡。除了資金問題，照顧中心數量更是求過於供，抵埗後他馬上聯絡超過20多間院舍不果，最後在相識的朋友介紹下找到院舍，但從家裏出發到中心，來回動輒3小時。
「我哋老喇，身體開始出現毛病，如果過身個女點樣照顧自己，呢度服務好短缺，好多都喺照顧者出現災難級嘅情況，先會安置『被照顧者』。」照顧者和被照顧者是依存的關係，他憂慮的不單是盈盈日後面臨的困境，還有同一個制度背後﹑無數相似的命運。
換個地方後，他希望重投社福界延續未竟之志，幫助情況相似的家庭。「我相信佢哋面對嘅困難都幾大，我想通過呢度嘅制度﹑搵返呢度嘅議員去傾政策制定嘅過程，我都想改革番呢度制度。」
自由與不自由
「如果你話離開咗香港係相對自由，一定係；但係咪真係自由？其實唔係。」加拿大賦予他基本人權和言論自由，但張超雄指自己是以「走難」形式離開，與香港分離亦只是逼於無奈的選擇，「呢度唔係我有計劃咁話要退休度過餘生，呢啲全部都係逼出嚟，逼住行呢一步。」
離開故土，除了念掛着親友﹑仍在牢獄中受苦友人，「我仲可以發揮到一啲作用我都會做，呢啲都喺我嘅應有之義」
去年多倫多的七一集會上，是他宣佈流亡後首次公開露面。政庇獲批後，他重新在港人社區現身，在加拿大聽證會為《壹傳媒》創辦人黎智英及民主派47人初選案發聲，出席有關香港議題的集會。他形容香港本應向更民主及開放的道路邁進，社會公義得到更好的改善，但現時處境猶如「走回頭路」，因此希望在海外能夠以僅餘的身位為香港發聲，「講番出嚟畀大家警惕﹑為大家發聲，團結番香港人互相鼓勵﹑保持理想。」
在社福路上奔波多年，走過香港的政治議事心臟﹑重門深鎖的石牆﹑最後登上飛機遠走他鄉，對於過去，他直言「絲毫都冇後悔過」，「我以社工嘅角度去處世，喺大學教書希望培養下一代社工﹑追求社會公義同幫助弱勢社群；我能夠選到立法會嘅位置，用過去經驗同家庭背景幫助有需要嘅社群，政府有做錯當然要直接指出。」
「會唔會有朝一日我會返到去（香港）？宜家真係想像唔到，但我知道人係追求真善美，我地過去所追求嘅自由﹑人民可以發聲嘅方向同價值，最後必然會贏。」
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
