奧運是一個赤祼祼的戰場，無論你怎樣傾盡全力，打落牙齒和血吞，戰敗就是戰敗。但在摘金者的輝煌背後，是由無數敗戰錘鍊而成。28歲的香港重劍手何瑋桁，曾經歷差點退役的低谷，渾沌過後終於醒覺，以120%的努力爭得出戰巴黎奧運的資格，首戰竟遇上多年宿敵，奇蹟沒有出現，32強止步的他賽後痛哭訴說着：「我真係好想贏，好想贏」，他沉澱後再次企好，接受《追新聞》訪問：「要學識輸得起，輸係贏必經之路，輸嘅時候要快快企返起身，繼續向前衝」。
從小到大在運動場上摘牌摘不停，代表香港征戰海外亦拿到亮麗成績，何瑋桁回想那時年少輕狂，「覺得自己好掂，好自滿，亦覺得未來一定會好出色」。
直至遇上人生樽頸，找不到突破，2021年東京奧運外圍賽失利，「練習就好似返工打咭咁，夠鐘就走，唔想再練習，變咗唔鍾意劍擊，對劍擊失去衝勁。」
這波低潮維持了兩年，重擊了他的劍擊路，香港排名跌出頭十名以外，「差啲無得喺港隊訓練，當時諗係咪應該退役？究竟自己做緊啲乜？」之後連比賽都沒份兒，如要去參賽就要自費，「好似有把刀插入心臟咁痛」。
兩年低谷 隊友一句話逆轉心態
「我用咗好多辦法，有時會睇勵志YouTube片嘗試去鼓勵自己，但都推動唔到自己發奮」。直至聽到隊友們方凱申、吳浩天等人的鼓勵，「佢哋出發比賽前同我講『瑋桁，你得架。我哋個隊好需要你』我個心收到短訊時，團火返番嚟」，心想：「東奧令隊友失望，依家唔可以再令隊友失望，唔可以放棄，要振作返。」
由那時起，何瑋桁再給自己一次機會，全力向前衝，「好似突然俾人打咗好多巴咁醒返，開始無諗其他嘢，淨係盡力做好自己。」
奧運本來離他很遠，憑着這團火，他3年後終於站上這個舞台，「奧運係我嘅夢想，一個好珍貴嘅機會，我用咗120%嘅努力，練完基本訓練再加操，每日練7至8個鐘，每朝訓練前做體能、健身，訓練後再拉筋、去跑步， 再喺飲食方面節制自己」。
除了120%努力外，何瑋桁的隊友一直陪伴他走過難苦訓練：「我去巴黎前，隊友們應該放年假，但佢哋全部延後放假，留喺香港陪我一齊訓練，我覺得佢哋好好，非常多謝佢哋。」
奧運遇宿敵雖敗卻破5分魔咒
何瑋桁終於跑到奧運戰場，但首場32強賽事竟遇上多年宿敵——日本劍手山田優，以往對決從未取得多過5分，更曾輸15:1。結果，沒有奇蹟，輸了15:9。
賽後接受電視直播訪問，何瑋桁終忍不住淚水爆喊：「我真係好想贏」，這幕觸動了不少香港人，替他感到可惜。沉澱過後，他心臟更強大，「我已盡全力，未盡力就話有遺憾，盡咗力，我輸咗係我能力、心態上嘅不足，嚟緊我嘅運動生涯仲可以改進。今次取得9分，突破咗自己對山田優嘅成績，我已好滿意。面對強敵，要比之前攞多一分，甚至攞多幾分，令自己唔好輸得咁難睇。」
致拿不到獎牌者「對得住自己就ok」
「我覺得輸係贏之前必經之路，因為你輸得起才會贏得起。輸其實唔可怕，最緊要快快企返起身，繼續向前衝。」
何瑋桁與拿不到獎牌的運動員共勉，「最緊要繼續努力唔好放棄，雖然奧運唔係話參加就可以參加，亦唔知係咪仲有機會，但前面仲有好多大型比賽，大家可以繼續努力去爭取自己嘅榮譽，同埋展現自己咁多年努力訓練嘅成果出嚟，最緊要對得住自己就ok。」
9月、10月開季，何瑋桁已訂下目標，在大獎賽、亞錦賽及全運會等爭入四強，亦劍指2028洛杉磯奧運，希望再為港出戰。
香港人又怎會放棄？
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
