逾4,000人周六（8日）逼爆皇家鑄幣廠舊址，反對中國超級大使館活動。塔村警方（Tower Hamlets Police）證實以涉嫌違反《第14條》（Section 14）為由逮捕2人。《追新聞》接觸到其中一名女示威者Wing，她表示由下午3時許被捕，到4時許抵達警署，「喺臭格留咗最少8小時，都會考慮申訴，因為我認為警方使用過度武力」，直到周日凌晨3時許才離開警署，獲有條件保釋候查，警方暫未作出起訴。
報道無罪 知情有價 請即訂閱《追新聞》：
https://www.patreon.com/thechasernews
Wing憶述事發經過，集會由下午2時開始，但當時遲到了約50分鐘，近下午3時在主要人群的後排，當時聽到大會指揮在場人士「企疏啲」，同一時間，警察要求集會人士「企返入啲」。她說：「當時咁啱有個警察喺我呢邊，叫我行去左邊，佢開始針對住我，話點解唔郁，要用Section 14拉我。我望一望佢，但我後面有好多人，之後有個警察好惡咁叫我行過啲，唔郁就拉我，我反問同佢講後面都好多人，點解剩係同我講嘅，我感覺到俾佢哋針對。」
Wing指出當時她獨自參加集會，其中一個警察就一手扯着她要作出拘捕，而現場畫面都已經看到現場情況，之後陸續有更多警察抬她上警車，「我有掙扎，因為覺得受到不公平對待，我一個咁瘦嘅女仔，佢哋用5個警察捉我係好過份。跟住上車上手扣，佢哋擺我上警車係唔畀我上個座位度，而係一嘢掟我喺車廂嘅地下度，直至有女警嚟到先扶我上座位，嗰陣係5個男警對付我一個女仔，我覺得不能夠接受。」
另一名被帶上警車的香港男子，於周日凌晨2時許已離開警署。《追新聞》向倫敦警察廳（Met Police）查詢，警員以涉嫌違反《第14條》（Section 14）為由逮捕兩名人士，暫沒有進一步補充。
詳情請繼續留意《追新聞》報道。
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
