隨着立冬正式來臨，英國正式進入寒冷嘅冬季，雖然我哋唔似其他動物需要冬眠，但都有一啲養生法則可以供大家參考。

《黃帝內經：四氣調神大論》咁樣講：冬三月，此謂閉藏，水冰地坼，無擾乎陽，

1. 早臥晚起，必待日光，
2. 使志若伏若匿，若有私意，若已有得，
3. 去寒就溫，無泄皮膚，使氣亟奪，
4. 逆之則傷腎，春為痿厥，奉生者少。

1. 英國冬天較凍又早天黑，入夜無特別嘢好做？大家早啲瞓啦、避免捱夜，先至可以養好肝臟。肝功能良好，對整個身體新陳代謝及排毒、造血等功能均有莫大益處。

中醫建議大家不晚於11點入睡，以免傷肝耗血，令肝火上升。喺冬季時節，如非必要，瞓晏少少，等到日出先起身，才能養精蓄銳，對整體健康皆有幫助。

2. 而在內在情緒方面，冬三月要令內心嘅意念平和而靜寂，盡量避免有過於私欲嘅想法。保持身心平衡和寧靜，以應對冬季寒冷與環境變化。

3. 注意添衣保暖，盡量避免劇烈運動致出汗吹風，以免着涼感冒，令熱量得以保存在體內，有助臟腑健康。

4. 如果冬天不順應自然養生之道，則會耗損腎氣，並可能在春季出現身體虛弱、痿厥等問題。因此，冬季養生至關重要，以確保機體在春季來臨時能夠有足夠嘅健康活力。

總括而言，冬三月其實係屬於休養生息、儲備嘅時間。香港人習慣咗不論做咩嘢都「去到盡」，其實依幾年大家都攰喇，大家趁呢個冬天好好休息、重新審視自己，先至可以行更遠嘅路。香港人加油！

Ryan 趙醫師
香港註冊中醫
英國曼城註冊針灸師
青木堂中醫診所醫師

---