自從嚟咗英國，生活簡單咗，購物意慾大減，每個月最大花費都係去超市，偏偏碰上40年最勁通脹。雖然最新數據顯示升幅輕微回落，但都仲高企喺10%，好多基本食品好似油、糖、奶呢啲講緊貴咗40%，而超市啲優惠又縮晒水，好似Sainsbury咁，我已經好耐無收過佢嗰啲網上購物滿60鎊減12鎊嘅券，所以都要諗吓有咩方法慳錢。
之前有呢啲Online Coupon，配合埋Top Cashback（TCB）回贈，同掃吓Shopmium有無咩嘢產品可以再減價，都總算可以慳到少少錢。依家就要轉新玩法，就係用埋JamDoughnut（JD）呢個優惠App。佢個玩法都似TCB，但最大分別係佢主要係買gift card，連TCB無嘅Sainsbury、M&S、IKEA呢啲都有，而且回贈高過TCB，普遍都有3、4%，M&S仲去到5%以上，喺依家通脹咁勁嘅日子，其實都算唔錯。
當然，TCB呢排又時不時佛心大發，消費5鎊就送2.5鎊，甚至3鎊，所以每次見到呢啲優惠，Charlotte都第一時間買gift card。好似嗰日送3鎊，我就同老公一人買一張，等於即賺6鎊，跟手去Morrisons買牛腩，連同Morrisons App內9折優惠券，再用埋JD買嘅gift card找尾數，本身32鎊嘅嘢，連同回贈就等於慳咗約9鎊。係有少少麻煩同複雜，但慳到錢又真係好有滿足感。S表妹仲勁，佢就用5鎊買張Asda gift card賺3鎊回贈，連同Asda個App嘅5鎊迎新優惠，即時輕鬆賺8鎊。
