2022/23財政年度只係去到4月5號，記住唔好蝕咗ISA個免稅優惠，如果有閒錢，不妨用盡每年2萬鎊個投資免稅額，特別如果你係有開Lifetime ISA，就記住入4,000鎊落去。另一樣要做嘅，就係睇吓自己有無交多咗稅。

原來，英國係有超過200萬合資格嘅已婚人士，係無拎到已婚免稅額，兩公婆如果其中一個無返工（Non-income tax player），另一個又只係交基本稅率20%，咁就可以申請將無返工嗰個嘅免稅額10%，即係1,260鎊轉畀另一半，咁樣就可以一年交少或退返250鎊稅。

另一樣嘢要留意嘅就係自己個Tax Code究竟有無錯。一般嚟講，糧單應該顯示「1257L」（一年免稅額係12,570鎊）。Charlotte之前都試過，明明係嚟英國後第一份工，點解第一個月出糧就扣咗稅，原來係公司亂咁填咗另一個Code，稅局有理冇理都會即時扣稅，咁你係要自己聯絡稅局去改返，之後佢先會退返你交多咗嘅稅。

仲有，如果你返工係要着制服，那怕只係一件T恤，只要係你僱主提供，又要求你一定要着住嚟開工，而由你負責自己洗返，原來你都可以申請uniform tax rebate，一般每年可以拎返12鎊，如果你係做護士呢類工作，仲可以拎多啲。除咗制服退稅，如果你嘅工作涉及揸車（揸返工就唔包），或者要交會員費拎某種專業資格先可以做得，呢啲都有機會可以退稅，詳情可以自己上去政府網頁刨吓。最後留意返，申請退稅有時限，如果要申請返2018/19年度嘅稅，最遲就要4月前搞咗佢。

Charlotte

出生草根家庭嘅港女，自小養成慳儉性格，但唔等於節衣縮食，認同應使則使，更鍾意用好抵嘅價錢去享受生活。以前一年去幾次日本，前年移居英國，但慳錢嗜好終身不變。