![](https://thechasernews.co.uk/wp-content/uploads/photo_2023-03-03_21-20-58-1000x1000.jpg)
因為天氣差導致農作物失收,所以呢期行超市的確係少咗好多菜賣,雖然唔係完全無,但有時想買吓蕃茄煮吓意粉,都要碰吓運氣。見到英國超市啲貨架吉咗,啲香港愛国傳媒又第一時間大做文章。
不過都係嗰句,英國人有咩風浪未見過,大家都係「Keep calm and carry on」。首先,呢度無人要去搶購,同埋其實只係超市無得賣,行去Costco、東歐舖、印超,其實依然有一大堆蔬菜任揀(起碼暫時都係)。超市無咩菜賣,只係某啲貨品來貨價太貴,超市計唔掂數,寧願唔入貨,或入少啲貨啫。
如果唔執著要買特定蔬果,其實仲有好多選擇,例如可以訂Oddbox、Wonky Veg Box。先講Oddbox,佢講明一盒有成9樣唔同嘅蔬菜,好大機會可以試吓超市唔常見嘅蔬菜,佢仲好細心咁跟埋食譜教你可以點煮。佢有唔同嘅份量畀大家揀,以2人份為例,夠食一星期都係12鎊左右,就免費送上門。依家第一次落單,仲有半價優惠。
至於Wonky Veg Box,其實都係類似嘅嘢,之前Charlotte亦有提過,話佢哋主要係啲無咁「靚仔」、超市唔肯要嘅蔬果,但其實食用無問題,仲係產地直送。佢依家仲可以揀訂埋一樣係缺緊貨嘅雞蛋,或者麵包,非常方便。順帶一提,佢都有同食物銀行合作,會定期捐啲食材回饋社區,所以都值得支持。