捱過咗冬天，準備嚟到英國全年最正嘅春夏天，又係時間計劃下啲旅行。以前喺香港，一定捕住唔同廉航減價優惠，隨時買特價機票返鄉下。嚟到英國，無晒Flyday.hk、又飛啦！呢類網站，又可以去邊度搵到呢啲旅遊優惠資訊？今日就等Charlotte介紹幾個可以留意嘅情報網站。
第一個就叫Secret Flying，我執筆寫呢篇稿嘅時候，就見到佢有幾個英國出發嘅機票優惠，好似6月曼城飛巴黎，來回只係30鎊，當然呢口價就未包寄艙行李，同埋唔會係早機去夜機返呢啲靚時間，但勝在真係好平，輕裝去快閃都唔錯。另一個由倫敦去葡萄牙度假勝地Faro，4月嘅來回機票仲低至24鎊，真係隨時喺英國坐程火車去遠啲都唔似呢個價錢。
唔想煩諗住咩酒店嘅，可以睇吓Holiday Pirates，佢係機票、酒店、套票，甚至郵輪優惠都有，好似有個盤係5月去馬德里住3晚4星酒店，每人先172鎊，加埋張廉航機票來回，其實個價錢同以前喺香港放假去幾日台灣差唔多。另一個5月尾喺修咸頓上落船嘅郵輪假期，坐P&O新船去西班牙、法國，玩地中海，14晚講緊每人685鎊，仲要連埋稅同小費，真係平得好離譜，Charlotte如果有咁多假，都想即刻報名。
最後仲有個叫Jack’s Flight Club，佢就只係簡單登記做會員，咁每星期就會收到啲筍Deal，如果想收多啲，仲可以課金做尊貴會員。
Charlotte
出生草根家庭嘅港女，自小養成慳儉性格，但唔等於節衣縮食，認同應使則使，更鍾意用好抵嘅價錢去享受生活。以前一年去幾次日本，前年移居英國，但慳錢嗜好終身不變。
