伴隨香港人近20年的RubberBand終於圓夢，World Tour進入倒數，本周五在英國倫敦第一站掀開序幕。「說了再見，約定再見」這句歌詞對港人來說百般滋味，可是這次RubberBand不想帶着憂愁跟大家「團聚」，反之期望藉着「作品會說話」為散落歐洲的港人送上充滿熱度的擁抱，這一抱不僅為在英港人添溫暖，亦溫暖了RubberBand，猶如四子接受《追新聞》訪問時說：「帶住『音樂菠蘿包』畀離散香港人係一種懷緬，喺兩個半鐘，有一班人同你唱廣東話歌，你又可以跟住佢唱，就係咁簡單」，「畀返啲力量大家，溫暖返大家。」

報道無罪　知情有價　請即訂閱《追新聞》：
https://www.patreon.com/thechasernews

「Ciao World Tour」這個「約定」原於去年實行，但因疫情幾經波折，延至今年舉辦。World Tour對RubberBand來說既緊張又是成就，主音6號坦言對開騷感到興奮，「我哋喜歡嘅樂隊都會做music tour，我哋朝住呢個目標行，到2023年終於圓夢，其實真係好開心。另外，又可以探返過去兩、三年離開咗香港嘅朋友，想通過呢幾晚音樂會畀返啲力量大家，溫暖返大家。」

直到你我不給分隔
在剎那相擁 髮早白

低音結他手阿偉補充説：「可以同返好多去咗外國生活嘅朋友、香港人再相聚，那怕只係一個晚上，我相信對於我哋同大家都係一件開心事。」 今年香港樂隊或歌手陸續來英國開騷，對於歌手來說，跨越數千公里獻唱猶如表達一份惦記，送上一個「擁抱」？阿偉說：「我覺得你形容得好好，對歌迷同我哋自己都係一種慰藉，特別係過去幾年，大家經歷咗好多離別，如果我哋能夠將歌曲，即係香港嘅『味道』，帶到去海外，對我哋係好滿足嘅事。」 鼓手泥鯭亦十分認同他們的歌曲是香港「味道」，「因為我哋唔識整菠蘿包，所以我哋將『音樂菠蘿包』帶畀餓咗好耐嘅大家，都好想知道大家生活得好唔好？喺演唱會度見到大家精精神神已經好好。」

今次跟兩年前在香港的Ciao演唱會不同之處是，2021年的Ciao（可解再見或打招呼）着重「道別」，兩年後的今天，疫情放緩、很多地方已開關，這次是來到彼邦跟大家「Say Hi」。

《Ciao》、《這刻我們》及《好好地過》靈感都是來自離開了香港的朋友，泥鯭叮囑：「無論兩年或三年前決定離開的人，都會面對好多挑戰或不安，我哋想安慰大家，無論面對任何不安，都要繼續move on向前行。」6號亦說：「我哋橫越咁多公里，同大家見面，感恩亦好珍惜，好多嘢都係歌詞之中，歌單畀到大家力量，同時都畀到自己力量。」

這刻我們在一起  笑喊悲喜
巨浪翻起  亦是在一起

6號是性情中人，出名眼淺，他很擔心在演唱會上見到離散的老朋友面孔時，忍不住淚流滿面，「我盡量唔會期待，因為我好容易被一班人嘅畫面觸動到自己，我諗我喺台上寧望遠方，望住啲燈唱晒成個騷。」 但泥鯭最期待是彼邦大合唱，「我哋好期待去到倫敦、曼徹斯特，大家都識唱我哋嘅歌，大家都一齊唱，呢個energy交換，無論對我或者現場觀眾嚟講都好犀利」，「我亦想邀請Mark Lui（雷頌德）嚟睇騷，佢係我哋恩師，佢睇住我哋入行做音樂，好想佢畀comment我哋做成點。」而阿偉很想邀請填詞人黃偉文（Wyman）及周耀輝老師來欣賞演唱會，「因為佢哋幫過我哋填詞，亦係我好欣賞嘅人。」

結他手阿正在英國讀書時已開始夾Band，他識於微時的英國人隊友亦會赴倫敦捧場，「佢哋問喺邊度演出？一睇到個場地，佢哋嚇到傻咗，佢哋話『喺呢度？嘩！你哋好勁喎』，我希望帶到佢哋去後台，認識我依家嘅隊友。」

懇請每天  好好地過安定還是冒險
好好掛牽  來日後見

阿正坦言要好好把握機會「享受英國」，「以前喺英國讀書唔係好珍惜所有風景、食物，依家想返嚟食返以前食過嘅嘢、見返一大片草地得啲羊、牛，enjoy英國嘅下雨天，我好鍾意食Apple Pie，希望今次返嚟食多啲apple crumble pie。」

除了阿正外，6號對英國亦有情意結，「2019年阿正同埋兩個曾經喺英國讀書嘅團隊成員帶住我哋三個盲毛去遊英國，去Band友朝聖熱點Beatles 拍封面嘅Abbey road，扮過馬路影相，好想模倣返嗰張經典相。」

阿偉對英國印象最深「係當時見到小時候喺香港見到嘅嘢，特別係一啲標誌、郵筒，好有一種親切嘅感覺。」而泥鯭希望重遊海德公園（Hyde Park）、白金漢宮，「今次去英女皇已經過身，查理斯即位，感覺好似見證住整個過程。雖然唔係住喺英國，但都想再去睇吓有咩唔同。」

讀者Q&A

難得RubberBand來到英國，一眾粉絲有大量問題想問他們，《追新聞》在訪問前收集了一些問題代粉絲提問，其中一名讀者問RubberBand有沒有計劃去台灣開演唱會？泥鯭透露有計劃到台灣開騷，「不過一步一步嚟，因為有好多嘢未落實，所以暫時唔會公佈，但我哋都好想大約今年年中去台灣同大家見面。」

另外，有讀者希望聽到6號live清唱《Ciao》，你都想聽？就要收看RubberBand「Ciao World Tour」演唱會倒數訪問：https://youtu.be/sdjw8aGcv4A。

《RubberBand Ciao World Tour 2023》歐洲站
英國倫敦
日期：3月24日（五）
時間：晚上7時30分
場地： OVO Arena Wembley
票價： £138 / £68（全坐位）
●售票網址： https://www.axs.com/

英國曼城
日期：3月26日（日）
時間：晚上7時
場地：AO Arena
票價：£138 / £68（全坐位）
●售票網址： https://www.ticketmaster.co.uk/

德國柏林
日期：3月28日（二）
時間：晚上8時
場地：Huxley’s Neue Welt
票價：€85（全企位）
●售票網址： https://www.dodotickets.de/

荷蘭阿姆斯特丹
日期：4 月 2 日（日）
時間：晚上8時正
場地：Melkweg
票價：€85（全企位）
●售票網址： https://ticketmaster.nl