香港大學數學系前副教授丁南僑是進一步多媒體的末代社長，「進一步」曾為「佔中三子」的戴耀廷和陳健民出書，於上月8日因「香港再難出版理想中的書」而結業，丁教授說：「即使出版社不在，出版過的文字也會留存在我城的記憶之中 ——只要我們當中有人沒有遺忘」。沒錯，本着與遺忘鬥爭，丁教授在六四35周年前，出版了《小燭光》繪本，記載維園曾長燃30年的燭光，留住記憶，繪本以鄒幸彤作主角，傳承她勇敢對抗暴政的精神。
報道無罪 知情有價 請即訂閱《追新聞》：
https://www.patreon.com/thechasernews
《小燭光》再燃 保存歷史
「其實大概兩、三年前，同朋友傾開，睇到香港嘅歷史將會被改寫，一定要將發生過嘅事，同埋一啲人做過嘅好事，記低落嚟。如果唔係，我哋後世就會遺忘，而且真正嘅歷史亦會被改寫。最後，我哋揀寫鄒幸彤，雖然我唔認識佢，但因為佢喺庭上嘅表現令人有好大嘅鼓舞、好大嘅鼓勵。佢抗辯係完全合情合理，啟發到我覺得有啲事係正義嘅，應該要做嘅就去做，回歸初心，直率、果敢。」
丁南僑這兩年便開展策劃出版繪本，找來作者「日知」及由著名台灣兒童文學工作者林真美介紹下，認識繪者Dino。作者建議寫鄒幸彤跟大眾的交接點——六四燭光晚會，故事就由一個小城的大公園與小燭光開始……。
「繪本篇幅較短，我哋重點講小燭光嘅精神，家長可以分享自己參與維園晚會嘅經歷，或者佢哋作為一個香港人，點樣去感受呢個支持民主嘅活動。雖然繪本無講六四係咩事，但我哋都有一個諗法，將來如果可以，會將六四小燭光嘅相關資料放上網，等有興趣嘅讀者睇多啲六四資料。」
有年輕人批評六四燭光晚會「行禮如儀」，對於參加了27年燭光晚會的丁南僑來說，「就算唔承認我哋所謂叫做『中國人』，覺得自己係香港人、台灣人，甚至係美國人、英國人都好，其實底線係人類嘅共感。例如另一個國家有啲民眾爭取自由民主，爭取公義，而俾政府殘酷打壓，你就算唔係呢個國家嘅人，你都係會同情、支持佢哋。有位朋友講得好好，六四本身嘅事情係中國大陸嘅事，但六四之後喺香港舉行嘅燭光晚會，已經係香港本身嘅事，睇政權點樣回應一眾追求民主公義嘅市民。呢個已經係香港創造嘅歷史，公民社會參與足足做咗30年，呢個係好amazing嘅。」
讓同路人看見 感到不孤單
1992年由美國回香港的丁南僑，在傘運的幾年親歷香港自由被剝奪。近年移民到台灣，看到香港民主的倒退感到痛心、難過，但亦有所啟發，「你一路以為take for granted，以為有咗就好難消失嘅嘢，其實一下子可以消失，關鍵係在於權力喺邊個人手上。如果我仲喺香港，就出唔到呢本書，一定好似《羊村》咁被禁。」
那麼為何冒着「違法」風險仍堅持出版《小燭光》？「書籍係好有趣，好有作用。雖然依家睇書嘅人無以前咁多，但至少本書成為咗焦點，引起社會關注。另外，書本係一種記錄，係人類歷史好重要嘅媒介體，比影像更優勝，一本書可以流傳幾百年、上千年。一千年前嘅書本，只要懂得嗰啲文字，就可以知道當時嘅人嘅思想」，「最重要係大家睇到有人做咗啲事，代表自己唔係孤單嘅，哪怕呢本書唔能夠賣到香港，但係我估香港嘅朋友最終都會知道繪本嘅存在。」
對抗極權，香港人還可做甚麼？
「凶惡嘅政權其中一道板斧係打散公民社會，將我哋人與人之間嘅聯繫拉斷，所以大家要互相鼓勵、支持，保持人與人之間嘅聯繫係好重要，另外就係惡魔其實係好多人唔覺唔覺養大嘅，咁我哋一定要警醒，好似鄒幸彤咁，敢於發聲，敢於爭取，敢於講真話，世界就唔會咁容易倒塌。」
「好多朋友離開咗香港，對香港好多留戀，譬如話好想食雲吞麵、乾炒牛河咁，而我覺得嗰個地方唔係最重要，係嗰度嘅人先最重要。如果香港全部換晒血，咁我唔會再對香港有咩眷戀，因為我眷戀嘅都係同我一齊成長，一齊努力工作，一齊喺嗰度生活享樂嘅香港人，如果呢啲香港人都離散晒，咁我嘅香港就係喺外面嘅世界。」
盼可將「燭光」交給你
「我期望大家認同小燭光呢種精神，每個人能力都好有限，就好似一支細細蠟燭咁，但係支蠟燭都可以帶嚟光，帶嚟熱。雖然唔係好多，不過你喺維園見到幾萬支燭光一齊點嘅時候，你就覺得好震撼。如果我哋好多人都係本住呢一份良知，做少少好事，我覺得就會對個世界帶嚟好大影響，世界就會變得更善良。」
對於參加過維園晚會嘅人，「我希望繪本帶畀佢哋一種慰藉，一種鼓舞，令佢哋繼續無論喺香港也好，喺離散嘅地方都好，都有一種暖暖嘅心繼續再行下去、走下去。」
《小燭光》購買方法
1) 網購表格
https://forms.gle/tWNpcdrJXyP45EQb8
2) 6月22日「雷丁香港人社區中心」市集即場有售！
地點：The Wren School, RG30 2BB
時間：12pm – 4pm
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
