一周一劑｜頭暈點算好（趙醫師）

先排除頸椎問題，喺中醫角度去睇頭暈嘅成因主要分為氣血虛衰、痰濕上擾、腎精不足以及肝陽上亢四類。等我哋一齊了解一下。

1. 氣血虛衰
關於氣血，我哋可以簡單理解為身體內嘅能量水平。如果我哋長期用腦過度、休息時間不足，睡眠質素欠佳，則會出現「叉唔到電」，不能儲備能量嘅情況，繼而導致頭部供氧不足而致眩暈。

2. 痰濕上擾
「脾為生痰之源」，如果過食生冷涷飲，耗損脾陽，令水液不能正常運化上行，反而會形成痰濕等病理產物。若痰濕上衝堵塞於內耳膜迷路則可見發生積水、出現頭暈嘅情況。

3. 腎精不足
「腎主骨、生髓、通於腦」，若然天生體質較弱、或隨着年紀增長身體機能減退，又或者年輕男士縱欲過度等因素致腎虛，則容易出現頭暈嘅情況。

4. 肝陽上亢
此類嘅頭暈患者，最常伴有高血壓嘅病史。由於各種因素，血液循環唔理想，陽不入陰，血液不能有效回流進入肝臟，久而久之長期向上衝，則會出現頭重腳輕嘅頭暈情況。

要治療頭暈，睇中醫，讓醫師辨證論治，對症下藥當然係最直接嘅方法。此外，平時注意飲食及多休息早啲訓亦係必需的。然而，針對頭暈，有一啲穴位都可以即時幫到手嘅，例如手部嘅合谷穴和內關穴，以及位於後枕部嘅風池穴同翳風穴等，大家可以輕輕按揉五分鐘左右，可有效緩解頭暈嘅情況，希望大家可以遠離頭暈嘅煩惱啦！

Ryan 趙醫師
香港註冊中醫
英國曼城註冊針灸師
青木堂中醫診所醫師

《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。