上次講完精，今次講氣。「好強嘅氣！！！it’s over 9000!」
例牌開頭，個個都聽過氣，周圍都係氣，人人都有氣，但中醫嘅氣又係乜東東呢？
氣嘅含義，既係身體運行嘅精微物質，又係人體活動嘅能源。中醫講緊嘅氣係物質亦係功能，分好多種，有元氣、清氣、谷氣、宗氣、衛氣、營氣。等我逐樣簡單介紹下。
元氣：又叫原氣、真氣，同上次講嘅腎精有啲類似，係生命之源，都係收藏喺腎入面，由脾胃後天之氣所供養。係一身之氣，元氣嘅盛衰反映一個人身體好定唔好。
清氣：自然界中存在，經過肺臟吸收。
谷氣：水谷之精氣，又叫水谷精微，飲食物入面嘅精微物質，經由脾胃消化吸收，又再有分營氣、衛氣。
宗氣：由谷氣同清氣結合而成，積聚胸中嘅氣。《靈樞.邪客》：「故宗氣積於胸中，出於喉嚨，以貫心脈，而行呼吸焉。」
營氣：水谷之精氣，行走喺脈內，與血共行，因為佢富有營養化生血液又用喺營養周身，所以叫營氣，又有人直接叫「營血」、「營陰」。《靈樞.邪客》：「營氣者，泌其津液，注之於脈，化以為血，以榮四末，內注五臟六腑。」
衛氣：同樣生於水谷，源於脾胃，喺脈外嘅就叫衛氣，有溫養內外，護衛肌表，抗禦外邪，滋養腠理，開闔汗孔等功能。又有人叫「衛陽」。《靈樞.本臟》「衛氣者，所以溫分肉，充皮膚，肥腠理，司開闔者也，……衛氣和則分肉解利，皮膚調柔，腠理緻密矣。」
點解醫師乜都話你氣虛，因為你睇完上面就知一個氣字都有咁多種意思，一種氣又有咁多功能，其中一樣唔夠，功能就變差，健康身體，幾大功能，缺一不可。
李梓豪醫師
香港註冊中醫
青木堂中醫診所醫師
🌟加入YouTube頻道會員支持《追新聞》運作🌟
https://www.youtube.com/channel/UC5l18oylJ8o7ihugk4F-3nw/join
《追新聞》無金主，只有您！為訂戶提供驚喜優惠，好讓大家支持本平台，再撐埋黃店。香港訂戶可分享給英國親友使用。
