今期講《黃帝內經・四氣調神大論》。

原本係講養生，我又忽發奇想，嘗試用嚟追女仔先，大家可以與原文互參。

冬三月，此為閉藏，意為心底有對象，但係十劃未有一撇，不能貿然行動，「使志若伏若匿，若有私意，若已有得」，埋伏佢，扮偶遇，搭訕，接觸對方，有意無意間觸碰到對方，「去寒就溫，無泄皮膚」，窩心，獻殷勤。

春天三個月，係植物發芽嘅時間，係時候要曖昧，互生情愫，尋找各種嗜好，培養感情，不適宜出手，正所謂邊個先開口邊個輸個勢；「夜臥早起，廣步於庭，被髮緩形」，追過女仔都知道，或者係追男仔啦，夜晚梗係講電話，講到夜半三更，第二朝一早又見面，唔好Gel頭，但係要整齊，鬆衫鬆褲，大步大步咁行街，「以使志生」，呢句好重要，成唔成事嘅關鍵，「志」嘅意思係將外界嘅信息經過深度思考，作判斷之用，即係受唔受溝嘅關鍵。「生而勿殺，予而勿奪，賞而勿罰」，大概係叫你做吓兵仔先。

夏三月，此為蕃秀，指所有植物生長茂盛而且係好靚，「夏天，為大地帶來美腿」，先睇後幾句「若所愛在外」，即係叫你要表白，前面嘅「天地氣交，萬物華實，夜臥早起，無厭於日」，叫你盡情約會，一日太陽未落山一日都唔好返屋企，「使志勿怒，使華英成秀」，唔好發脾氣，扮得有咁靚得咁靚，「使氣得泄」，叫你去全壘打。

秋三月，此謂容平，打咗三個月波，都應該攰攰哋，應該要收斂一下，着番多件衫，早睡早起，瞓到自然醒，等大家都寧靜一下，開始互相敬重，「收斂神氣，使秋氣平，無外其志」，收起型英帥靚正嘅浮誇打扮，專心一致。

PS：此非關醫師追女仔經驗之談，純為學術上另闢新徑，引起大家對原文興趣。