我係烈大夫，經歷過奔波嘅路程，呢幾年香港人經歷過嘅路，城市生活嘅繁囂，英國同台灣移居嘅調整，我需要重新出發，我亦都相信好多香港人亦都需要重新出發。

尼泊爾義診係我生命入邊其中一個好重要嘅里程碑，亦係我中醫職業生涯入面其中一個好重要嘅記憶點，武漢肺炎後，世界秩序改變，今次係我疫情之後第二次過嚟尼泊爾，感受良多。

今次我除咗義診之外，亦會進行心靈退修，係希望為我未來人生嘅路程，添加一啲靈性嘅燃料，令到我能夠體驗生命嘅可貴，同時間可以令到我嘅專業可以幫到呢個世界有需要幫助嘅人。

我作為一個中醫師，我無怨無悔為世上患上疾病嘅人士提供治療，香港係一個富裕嘅地方，雖然而家嘅香港唔係我哋熟悉嘅香港，但係畢竟喺世界上面，香港仍然係相比世上好多貧窮地方都係生活優越，所以點解我呢10年都選擇喺尼泊爾、不丹、斯里蘭卡同烏干達進行義診嘅原因。

中醫治療，講穿咗就係傳統自然療法，而我哋秉承數千年文化承傳，造就咗我哋，可以應用針灸治療，就能夠處理好多唔同嘅疾病，今次尼泊爾義診我冇帶任何藥物，只係利用我嘅針，治療當地人所需。

喺未來我會繼續進行我嘅路，為學術自由發聲，為義診之路繼續行落去，為着發展全球傳統醫療行業而繼續努力。

我係一個中醫師，我係來自香港嘅，願榮光歸香港！